திருவள்ளுவர்

 

பொங்கல் வருது-சிறுவர் பாடல்

பொங்கல் வருது பொங்கல் வருது

தை தை தைப் பொங்கல் வருது|

பழைய கவலை மறந்து மகிழ 

தை தை தைப் பொங்கல் வருது|

ஊரும் உறவும் கூடி மகிழ
தை தை தைப் பொங்கல் வருது|

பாதி முற்றம் பூசி மெழுகி
அரிசி மாவு கோலமிட்டு|

கும்பம் வைத்து விளக்கேற்றி
தோரணமும் கரும்பும் கட்டி|

கோல நடுவில் அடுப்பு வைத்து
புதுப்பானை அலங்கரித்து|

பானை நிறைய நீர் ஊற்றி
அதன் மேலே பால் நிரப்பி|

மாவிலையும் திருநீறும்
சந்தனமும் சாந்துமிட்டு|

பானை நிறைய பொங்க வருது
தை தை தைப் பொங்கல் வருது|

பொங்கிய நீர் எடுத்து தெளித்து
பச்சரிசிப் பயறும் போட்டு|

சர்க்கரையும் பசும்பாலும் 

நெய் ஏலம் முந்திரியும்|

சேர்ந்த வாசனை நாவை நனைக்க 

தை தை தைப் பொங்கல் வருது|

பொங்கல் பொங்க வெடி வெடித்து
பானை இறக்க வெடி வெடித்து|

இலை பரப்பி படையல் வைத்து
உரித்த பழத்தை பரப்பி வைத்து|

உயிர் வாழ உணவு தந்து 

உதவியநல் உழவர் வாழ்க..|

உலகம் தந்து உயிரும் தந்த 

சூரியனார் புகழ் வாழ்க...|

என்று சொல்லி போற்றி மகிழ
நன்றியுடன் வணங்கி மகிழ|

பொங்கல் வருது பொங்கல் வருது
தை தை தைப் பொங்கல் வருது|

ஊரும் உறவும் சேர்ந்து நிற்போம்
நன்றியுடன் வாழ்ந்திருப்போம்|

படைத்த பொங்கல் பகிர்ந்து உண்போம்
பண் பாடுகாத்தல் மேன்மை என்போம்|

பொங்கல் வருது பொங்கல் வருது
தை தை தைப் பொங்கல் வருது|
பழைய கவலை மறந்து மகிழ 

தை தை தைப் பொங்கல் வருது|
ஊரும் உறவும் கூடி மகிழ
தை தை தைப் பொங்கல் வருது|

கோயில் செல்வோம்-சிறுவர் பாடல்

குமரப்பா குமரப்பா எங்கே போகிறார்?

குலதெய்வம் கோயிலுக்கு கும்பிடப் போகிறார்

குறைவில்லா நல்வாழ்வை வேண்டப் போகிறார்

கனகையா கனகையா எங்கே போகிறார்?

காவல் தெய்வம் கோவிலுக்கு கும்பிடப் போகிறார்

மடைகொடுத்து மனைகாக்க வேண்டப் போகிறார்

இளையதம்பி இளையதம்பி எங்கே போகிறார்?

இஷ்ட தெய்வம் கோயிலுக்கு கும்பிடப் போகிறார்

இடர் நீங்கி இன்ப வாழ்வை வேண்டப் போகிறார்

முனிசாமி முனிசாமி எங்கே போகிறார்?

ஈஸ்வரனார் கோயிலுக்கு கும்பிட போகிறார்

பிறப்பறுத்து முக்திநிலை

வேண்டப் போகிறார்

குலதெய்வம் காவல் தெய்வம் நாமும் வேண்டுவோம்

இஷ்ட தெய்வம் கடவுள் என்று நாமும் வணங்குவோம்

குறைவில்லா பெருவாழ்வு நாமும் வாழவே காலை மாலை தவறாமல் கோயில் செல்லுவோம்.

பச்சைக்கிளி -சிறுவர் பாடல்

பச்சைக் கிளியே பறந்து வா

பாலும் பழமும் நான் தருவேன்

இயக்கர் மலையை கடந்து வா

இறுங்கும் பொரியும் நான் தருவேன்

பூதர் புதரைக் கடந்து வா

புதிரும் கதிரும் நான் தருவேன்

நாகர் நகரைக் கடந்து வா

நெல்லும் சோறும் நான் தருவேன்

பச்சைக் கிளியே பறந்து வா

பாலும் பழமும் நான் தருவேன்

பச்சைக் கிளியே பறந்து வா

சிறைகை விரித்துப் பறந்து வா